中環出更：接掌菁英會 洪為民忙上忙
呢個世界好公平，一日廿四小時，個個一樣，不過點樣運用就靠你自己點安排，今日正式上任嘅菁英會主席洪為民，未來一年除咗自己公司之外，仲要忙菁英會工作，所以每日嘅行程表都要再編過，好彩菁英會同公司班兄弟夠齊心，屋企人又夠體諒，忙啲都無後顧之憂。
菁英會前晚喺北角海關總部高級關員會所設宴，成班執委會成員恭賀洪為民榮升主席，五十幾個人好熱鬧，爭住埋單嘅洪為民，希望藉呢餐飯多謝前主席白富鴻嘅帶領，洪主席仲特登喺創會主席施榮忻嘅酒舖度買咗廿支靚紅酒過嚟，不過為環保計，菜單就棄魚翅改食冬瓜盅，大家都讚好。
嚟緊活動多籮籮
講番個任期，雖然今日先開始，但係主席工作早就展開，以前逢周末都會同囝囝打機對決嘅洪為民，依家好難抽到時間，難得囝囝明白事理。菁英會王牌節目「博鰲青年論壇」嚟緊九月舉行，身為IT人嘅洪主席話，除咗經濟文化同教育外，今年會探討埋IT，依家磋商緊可能會請張藝謀、黎明、李寧呢啲重量級人物嚟參與添。至於明年四月，菁英會仲會首次到台灣訪問，真係活動多籮籮。
菁英會喺香港嘅地位日漸提高，吸引唔少新血加入，好似有馬會大董李國棟醫生位公子李民煇，同立法會議員林健鋒公子林凱章，佢哋今屆仲齊齊升職做執委添。從事金融嘅李民煇，食到一半就走先，事關要返公司睇實美國個巿，瞓唔夠幾個鐘又要起身睇香港巿，認真勤力。
落莊嘅白富鴻，雖然可以放低會務，不過佢做社會事務做上癮，未來都會繼續為社會服務，之前盛傳佢會參選區議會，佢口密唔肯講，淨係話會積極考慮。
卓妮