政情：肥胡揭威院擴建玄機
政府近期啲基建項目好多都喺臨上馬就畀人司法覆核，搞到全部停晒工，但係威爾斯親王醫院樓高十三層嘅住院樓暨創傷中心工程就快得驚人，○六年七月獲撥款廿二億興建，○七年動工，由設計到落成，只係用咗三十個月就搞掂，去年十月已經啟用。醫院管理局主席胡定旭尋日喺呢座新大樓開幕儀式上透露玄機，就係無任何黨派彈出嚟挑戰佢哋嘅環評報告，令到呢個回歸以來最大嘅醫療項目咁快投入服務。
尋日嘅開幕儀式遇上橫風橫雨，肥胡又利用風雨乘機大讚醫護人員專業，不論風幾大、雨幾大，佢哋都會盡力為市民服務，做到風雨同路。
原來肥胡舊年都去過呢座新大樓探病，探望當時肺癌病重嘅前支聯會主席司徒華。肥胡話，華叔當時見到佢，就捉住佢隻手，華叔話自己第一次住公立醫院，醫生同護士對自己非常好，又好用心照顧自己，非常感動。華叔今年一月，喺新落成嘅大樓病房去世。