政情：陳祖澤為大學生辯護
香港僱主聯合會刊物「CONNECT」最近訪問咗自己個會嘅前主席陳祖澤（John），了解佢對當前香港就業環境嘅意見。阿John做過政府高官，退休後轉到私人公司做管理層，政商界經驗豐富，佢喺訪問中為本港大學畢業生辯護，澄清一眾新丁其實並非外界所講咁差。
阿John曾經做過教育統籌司，由佢講教育最好不過，佢話近年經常有人批評香港大學生英語水平下跌，佢承認呢個係事實，但就提醒大家，以前香港只有百分之二嘅年輕人可以入到大學，佢哋都係精英中嘅精英，依家大學教育普及化，平均水平下跌又有乜出奇呢？
阿John喺訪問中又被問及退休後會點樣享受人生。阿John貫徹鬼馬本色，反問乜嘢叫退休呢？佢話自己已經退過幾次休，包括離開政府、九巴董事長職位，至今仍然係好幾間公司嘅非執行董事同擔任社會公職，所以好享受依家嘅生活，而且永不言休，會繼續令自己生活得更充實喎。