中環出更：高永文過百新書陪退休
做過無數公職嘅骨科名醫高永文，幾時都咁忙碌，但係點都估唔到，佢竟然忙到有興趣買書，但冇時間睇書，咁多年嚟已累積過百本新書未睇。
羨慕《漂泊的靈魂》
第四屆香港書獎結果尋日揭盅，喺銅鑼灣中央圖書館舉行頒獎禮，請嚟前首席大法官楊鐵樑及高永文任嘉賓。高永文自爆佢買書冇時間睇嘅憾事，難得佢仲好幽默，話退休後唔怕悶，可以慢慢睇番啲書喎！
高永文話自細就鍾意睇書，尤其偏好冷門嘅歐洲文學，但佢自嘲英文底子唔夠深厚，所以要睇中文譯本至明白。佢印象最深刻係德國名著《漂泊的靈魂》，書中主人翁經常四處漂泊，每次停留喺一個地方，當地人開始欣賞佢，佢就又要離開。高永文話，佢做咗醫生後感受特別深刻，事關佢入行後經常身不由己，尤其係忙到旅行都去唔到，所以好羨慕書中主人翁嘅瀟灑自在。
香港地寸金尺土，要搵地方安置佢啲藏書都幾頭痛。所以佢每次搬寫字樓，都要放棄無敵海景或單邊位，專揀夾喺中間位置嘅房間，點解？咪貪佢四邊牆身可以做晒書櫃囉！