中環出更：關育材方潤華獲頒榮譽院士
科技大學尋日舉行榮譽院士頒授典禮，中華煤氣公司執行董事兼營運總監關育材、大慈善家協成行主席方潤華等四位傑出人士獲此殊榮。科大早前打敗香港大學，成為亞洲排名第一嘅學府，呢個榮銜認真唔講得小，值得大事慶祝飲番杯喇！
關育材係專業工程師，難得佢幽默風趣，又識飲識食，難怪煤氣公司教人煮餸、做埋餐廳都冇難度。關育材無時無刻推銷明火煮食，原來佢都識煮番兩味，拿手好戲係炮製西餐。
煤氣公司喺香港有一百七十幾萬個客戶，內地用戶更加多達一千二百萬個，關育材要管好咁大間公司，少啲本事都唔得。卓妮問佢平時有冇開班傳授管理秘技，佢笑稱間中都有出席講座分享自己嘅經驗，退休後可以考慮吓專注講課喎！
陳有慶撐老友場
同科大關係密切嘅方潤華，向來淡泊名利，所以佢話唔使特別為此慶祝，尋日至親老友齊現身撐場，已經好開心。前來打氣嘅家人有囝囝方文雄夫婦同埋孫仔John、平時好少公開現身嘅方潤華囡囡方兆怡，亦全程陪伴在側，亞洲金融集團董事長陳有慶都親自嚟見證老友開心時刻。
方潤華話，佢已經擁有五個榮譽院士、十個榮譽學位，所以對呢啲榮譽睇得好輕，最緊要繼續努力為內地及香港嘅教育事業奉獻一己之力。
自從科大喺港大手中奪下亞洲最頂尖學府寶座之後，科大嘅成就備受讚揚，難怪校董會主席張建東同校長陳繁昌笑得零舍開心。
理工大學尋日亦向五位傑出人士頒授榮譽博士學位，包括諾貝爾經濟學獎得主約翰‧納殊教授及金山工業（集團）主席兼總裁羅仲榮等。約翰‧納殊教授為普林斯頓大學資深研究數學家，佢對非合作博弈均衡概念嘅分析及有關博弈論有重大貢獻，被譽為二十世紀其中一位最傑出嘅數學家。
卓妮