政情：梁孔德憂猩紅熱襲乖孫
養兒一百歲，長憂九十九，好似足球總會主席梁孔德同太太梁劉柔芬，雖然佢哋已經仔大女大，但榮升阿爺阿嫲之後，又要為孫兒憂心。梁孔德前晚入馬場，講開兩個寶貝孫就心都甜晒，但一提到近期來勢洶洶嘅猩紅熱，佢都話好擔心，除咗叮囑佢嗰兩個乖孫要注意衞生之外，仲要多做運動增強抵抗力。
梁孔德話，佢嘅六歲大孫鍾意打波，而四歲細孫就無時停，乜嘢都啱玩。至於會否希望兩個孫將來踢足球為港爭光，佢就話要畀啲孫自由發展，但據佢了解，大孫似乎鍾意打籃球多啲，細孫仲細個未定，不過無所謂啦，最緊要係細路仔自己鍾意。
講完兩個乖孫，嚟緊暑假梁孔德就會做乖仔，孖住太太梁劉柔芬一齊去美國三藩巿探望八十幾歲嘅媽咪，依家三藩巿氣候舒適，天氣清涼，過去陪媽咪周圍食吓嘢就最啱。不過，放假之前，佢話要先搞掂英超球隊來港比賽嘅準備工作喎。