中環出更：楊釗低調捐款撐社企總會
只要出心做善事，就算唔向外宣揚，都一定會有人知。好似有「牛仔褲大王」之稱嘅旭日集團董事長楊釗，早前就靜靜哋做多件善事，捐咗幾百萬元畀香港社會企業總會做種子基金，兼夾資助總會裝修會址及初期嘅營辦費用。
贊助成立會址
總會七千幾呎會址正位於楊釗旗下嘅觀塘旭日集團大廈，命名為「旭日中心」，尋日正式開幕，楊釗仲親身去撐場添！
總會會長郁德芬話，佢哋去年已積極物色合適工廈，好彩獲楊釗贊助得以成立會址，今後會址將成為社企、政商界及社福界嘅溝通平台。尋日有份出席主禮嘅發展局局長林鄭月娥就自爆同楊釗相識多年，話每次搵親「釗哥」幫手捐錢都永冇托手㬹，仲記得當年沙士期間搵楊釗捐錢畀沙士受害人，楊釗都講明唔想影相出風頭。所以話呢，捐錢後就算唔宣揚，都會有人知嘅！