政情：送蛋糕紀念筆馬會與眾同樂
馬會近年點子多多，成日搞唔同嘅噱頭同馬迷一齊玩，嚟緊今季最後兩個沙田日賽，即七月一日及七月十日，都會有唔同嘅驚喜送畀馬迷。先講七月十日嘅煞科賽馬日，到時會舉行被喻為係香港馬壇奧斯卡嘅「冠軍人馬頒獎典禮」，表揚馬匹、練馬師同騎師喺季內嘅傑出表現，大家可以見證馬王、冠軍騎師同冠軍練馬師嘅誕生，入場嘅馬迷仲會有煞科紀念筆派添！
有機會贏飲食券
至於七月一日，馬迷就可以甜一甜，事關一入場就會有一件禮餅派，入到場內仲有「天氣女郎」黃婉曼聯同多位少女組成嘅打氣團，佢哋會同現場觀眾玩遊戲，贏咗仲有機會贏飲食券。除咗有得玩，嗰日仲係香港廣東社團總會第一次搞盃賽，總會主席王國強話，佢哋申請呢日搞盃賽唔容易，所以由去年已經要入紙申請，到時成個社團嘅二十個高層都會到齊，加埋其他嘉賓，相信到時一定好熱鬧啫！
