中環出更：廠商會百萬獎學金捐浸大
中華廠商聯合會（廠商會）尋日捐贈一百萬元畀浸會大學，設立「內地交流獎學金」，資助學生到內地交流，會長黃友嘉、副會長顏吳餘英及楊志雄一齊將支票移交予浸大校長陳新滋。卓妮同黃友嘉傾開，原來佢未做廠商會會長前，曾經做過浸大客席教授，主講極大爭議嘅最低工資。
黃友嘉專心做會長
黃友嘉話，為咗做個稱職教授，當時都預備咗好多講義，將自己喺商場嘅經驗與同學分享。至於今後會否再去浸大教書，佢就話點都要等廠商會任期完咗先，因為仲有半年時間就落莊，依家要一心做好會長工作喎。
講番今次廠商會捐錢畀浸大，係源於去年十一月廠商會組團訪問浸大時，聽過校長陳新滋介紹浸大嘅未來發展規劃，對浸大致力培養新一代素養嘅理念好認同，所以促成咗今次美事。
卓妮