中環出更：商界名人暑假公幹外遊輕鬆吓
暑假又到，大家執好行李去旅行未呢？卓妮都諗緊去邊好，但出席前晚港交所周年晚會嘅商界名人，好多都話暑假要到外地公幹，惟有趁工作之後順便行多個圈輕鬆吓。
港人鍾意去旅行，香港亦係世界級貨運中心，所以機管局要計劃興建第三條跑道，身為機管局主席嘅張建東（Marvin）自然好忙，今個暑假都好難外遊。不過，咁啱佢要去外地開會，飛完美國紐約再飛英國倫敦，之後回程就會順道近近哋過去蘇格蘭打高爾夫球。
張建東打高球會好友
Marvin打咗高球三十年，為咗打出水準，無論邊個高球場都一定帶備私家球桿，態度咁認真，難怪咁耐以來試過打出五次一桿入洞（hole in one）啦！不過，佢謙稱依家年紀大，體力無咁好，但都希望可以再打出好球，加上又可以同朋友聯誼下，所以都好期待喎。
卓妮喺酒會又見到嘉華集團主席呂志和，佢話暑假會去美國三藩巿視察旗下十二間酒店，現時由二仔打理，希望巡視業務之餘又可以探下啲孫，加上氣候好，啲嘢又好食，度假就最啱嘞。講開又講，和叔兒孫滿堂，放假去邊都不愁寂寞啦！
馬時亨行程表密麻麻
中策集團主席馬時亨今年暑假同樣無得抖暑，要去加拿大開會，見到佢個行程表排到密麻麻，睇怕都無時間去玩，但肥亨腦筋急轉彎，到時點都會唧到啲時間出去行吓嘅！
啱啱卸任道路安全宣傳運動委員會主席嘅社交界名人余錦基，暑假就會去澳洲探外孫，到時帶住孫仔周圍去行吓，叉電兼休息。旅遊難免會放縱盡情享受美食，但基哥嘅血糖及膽固醇都超標，所以立心減肥十磅，唔使食藥都可以回復健康指標，所以佢旅行就算遇到美食，都係淺嘗即止。
卓妮