煲呔曾喺○七年競選特首時，曾誓神劈願咁承諾將利得稅由現時嘅百分之十六點五，減至百分之十五，惟佢上任至今近四年，喺商界極力催促下，呢張空頭支票依然遲遲未兌現。煲呔曾日前接受彭博專訪時，冷不防被對方問及減稅呢個承諾，對方仲喺報道嘅字裏行間寸爆煲呔曾「時日無多」，喺剩番一年嘅任內，難以帶領本港撼贏早已減稅吸引外資嘅新加坡。
彭博記者亦喺報道上，指出本港貧富懸殊日益嚴重，樓價節節上升，煲呔曾上任以來民望更係屢創新低，仲引述埋學者分析，話若果煲呔曾喺依家宣布減利得稅，只會進一步令人覺得佢偏袒大財團，總之寸到佢應一應。出外冇唱衰香港，但影衰香港嗰度弊呢！