中環出更：陳張思敏情陷3D花手袋
意大利名牌Valentino近年大玩玫瑰花設計，立體浮凸嘅花花手袋，擄獲唔少城中名媛芳心，中華總商會會長蔡冠深太太蔡關穎琴就係超級擁躉。日前卓妮見到潮州商會會長陳幼南太太陳張思敏，佢都情陷Valentino嘅花世界，當日手挽一個粉紫色Valentino靚袋，顯得好輕鬆自在。
首做Valentino粉絲
陳太話，佢年年過年都會買個新手袋氹自己開心，寓意萬象更新，呢個手袋正係今年嘅新歡，亦係佢擁有嘅第一個Valentino手袋。佢好鍾意紫色同埋粉紅色，所以特登揀咗粉紫色手袋，難怪卓妮見個手袋同陳太優雅閒適嘅打扮極之配襯。雖然佢首次做Valentino粉絲，但已經留意品牌好耐，好欣賞佢哋嘅玫瑰花設計。
咁啱此刻陳幼南行過，佢話自己間中都會買手袋送畀老婆。陳太聽罷笑稱，自己好奄尖，對手袋嘅大小同埋點樣用法要求好高，所以都係自己買最啱心水。