中環出更：林建康父親節收禮打孖上
愛沙尼亞共和國駐港名譽領事林建康（Matthew）經常同太太林黃寧豔有影皆雙，一對寶貝兒子亦聽教聽話，家庭幸福美滿羨煞旁人。前日卓妮喺沙田馬場見到林建康，佢好開心咁話，就讀拔萃男書院嘅大仔林孝勇成績幾好，新學期可以順利升讀小學五年班，佢覺得好開心。嚟緊暑假一家四口將同遊倫敦，再返太太外家新加坡，一於過個溫馨嘅悠長假期。
獲手繪T恤及知囝囝升班
啱啱過咗去嘅父親節，Matthew收到孝勇同埋細仔孝政聯手製作嘅禮物，兩兄弟喺件白T恤上畫畫，色彩繽紛嘅花草筆觸稚氣輕快，充滿童趣，確係有錢都買唔到嘅貼心禮物，難怪Matthew講起一對仔就笑不攏嘴。
咁仲未夠，Matthew仲話，剛收到孝勇可以升班嘅消息，佢覺得呢個禮物仲大添！計卓妮話，Matthew客氣就真，卓妮喺男拔嘅植樹日見過孝勇，佢好懂事又備受校長誇讚，加上有靚媽咪睇實，升班點會有難度？
Matthew一家四口復活節去咗杜拜玩，享受陽光與海灘，嚟緊暑假又計劃去倫敦叉電，接住返星洲探親。Matthew公務繁忙都仲咁注重家庭，認真係城中好男人嘅模範。