政情：馮康拉二胡治愈人心
醫院管理局中樂團啱啱攞咗個香港藝術發展獎銀獎。醫管局新界東總監馮康話，自己當時只係膽粗粗申請，冇諗過會得獎。佢仲話中樂團成立咗十年，當時淨係得小貓三四隻，佢第一日去睇其他醫護人員練習，仲發現佢哋拉嘅二胡都唔啱音。佢當時就覺得，基本功都未得，又點組樂團呢？
但皇天不負有心人，努力練習終於有回報。短短一年後，中樂團就獲邀去禮賓府演出，為醫管局慈善基金籌款。而醫管局中樂團亦都有定期去醫院同埋其他復康機構演出，馮康就話因為多數長者都鍾意聽廣東音樂，對佢哋嘅表演零舍有親切感。
講番馮康，其實佢從小就有玩開二胡，之後因為工作繁忙而停玩咗三十幾年，到○七年成立醫管局中樂團先再重拾二胡，但都係客串性質。佢話如果當音樂係另類治療方式，繼續服務病人同埋傷殘人士，都算係一種幾特別嘅療法。至於會唔會擴充個中樂團，吸引多啲醫護人員參與？佢就話隨緣喎。