政情：出招防「公投」林D9騰雞
港府早前建議修例取消補選，以後立法會有任何空缺均由最高票落選者自動遞補上去，將泛民自編自導自演嘅所謂「公投」變成絕響。立法會日前就有關修訂成立草案委員會，驟眼睇張成員名單經已相當震撼，事關共有三十九名議員報名加入，比政改本地立法嘅委員會成員仲要多，特別嘅係建制派佔廿八人，比泛民多逾倍！政制及內地事務局局長林瑞麟推出呢啲咁惹火嘅修訂出嚟，事先向建制派議員打定招呼，拍硬檔叫佢哋「冧友」撐場都好正常，但一次過搵成廿八個，未免太誇張啩，難怪建制派議員對佢嘅亂吹雞都有微言喇。
審議取消補選嘅委員會日前截止報名，張成員名單水蛇春咁長，其中泛民只佔十二人，包括去年發動「公投」嘅公民黨、社民連同人民力量全體議員，冇參與公投嘅白鴿黨亦只象徵式派咗三位黨員入會，其餘成員全數為建制派。專業會議同工聯會齊腳、經濟動力同自由黨各自有三位同兩位成員加入，民建聯亦好「盡責」地派出六名黨員加入委員會唱好修訂，大戰泛民。
39人報名比政改仲多
姑勿論報名加入委員會嘅三十九位議員會唔會去晒所有會議，但呢個報名人數經已多到破晒紀錄，就連去年叱咤政壇，搞到滿城風雨嘅政改決議案及本地立法草案委員會都唔夠佢鬥，莫非林D9怕「公投」仲怕過政改，要有十成把握肯定有關修訂喺建制派護航下必被通過？
建制派出得嚟行，預咗要還，畀港府拍膊頭叫到要幫手亦冇得Say No。不過，查實唔少建制中人亦對林D9呢啲缺乏自信嘅表現頗有微言。須知道杜絕公投呢啲咁具爭議性嘅修訂肯定有排玩，社民連同人民力量等議員亦早已表明會玩嘢，港府叫建制派冧友，明顯擺佢哋上枱擋箭，今次仲擺到明冧友冧到過晒龍，亂咁吹雞，小心「狼來了」喎。
立法會政制事務委員會聽日就遞補機制開會，今次唔使吹雞，好多團體都爭住發表意見，部分淨係睇個名都已經好搞嘢，例如有關注林公工會、蛇齋餅糉社團聯會、林D9寶貝搜尋小組同高官心肺功能絕頂關注組等，咁熱鬧，難怪個會預咗要開足八個鐘頭喇。