新界村屋僭建問題愈來愈複雜，「好打得」嘅發展局局長林鄭月娥同鄉議局討論村屋僭建問題。老朽但知做官的，確實要為人民服務，而且不分城鄉都要一視同仁。總之，「為官一任，造福一方」，不一定「打得」就有運行，識得耍兩招「模糊迷蹤拳」，拖一拖、隔一隔，這樣做官，挺好！
住喺新界村屋的四嬸打電話問老朽，話佢嘅天台玻璃屋屬整層圍封，是否要拆？老朽揚眉提聲：拆咗你就笨，如今「好打得」局長手下留情，丁屋三層以上的樓層，而建於「舊屋地」的「村屋」，則需先釐清地契條文才處理。釐清得嚟，咪變成「過盡千帆皆不是，斜暉脈脈水悠悠」。先釐清地契條文才作處理，呢一招令新界鄉紳父老「心神俱醉」，好！
至於四嬸整層圍封咗天台玻璃屋，老朽笑吟吟話佢知：衰鬼，你執到啦！局長話只要圍封範圍不超過樓層一半面積亦可保留，你頂多拆一半留一半，好似一魚兩吃，一半清蒸一半炒球，都幾過癮。剩番嗰半，你就搭個簷篷種吓蘭花，煮完晚飯又可唱首「我從山中來，帶着蘭花草；種在簷篷下，希望花開早」，你話咁嘅自娛人生幾咁滿足！快啲飛鴿傳書畀「好打得」局長林鄭月娥啦，多謝佢呢位「理順大師」。有林鄭，唔使開井，好水自然來！
老朽篇稿未寫完，住喺市區嘅不肖子又來電：老竇，我間天台舊屋被指「僭建」，如今使唔使拆？老朽好有信心咁話：你又唔係議員高官，唔需要以身作則，城鄉一家親，一視同仁，咪拆住！