唐唐自從被揭發涉嫌用公帑偷步搞選舉工程後，除咗第一日發表咗篇廢到無倫兼模棱兩可嘅聲明後，至今一直都左閃右避，欠公眾一個交代。即使曾表明話會跟進事件嘅新聞處，亦都冇聲冇氣，被傳媒窮追猛打依然堅稱「冇補充」，難怪班議員要各出奇謀，咬實唐唐唔放。
袋巾傑抽水一箭雙鵰
袋巾傑正計劃喺月尾嘅立法會會議上，質詢唐唐同班涉事公務員咁做有冇違反《公務員守則》及《行政長官選舉活動指引》，以及當局會否就事件進行調查。袋巾傑有意再喺下屆特首選舉代表泛民披甲上陣已非新聞，佢提出呢項質詢難免有利益衝突，事關既可逼唐唐交代，甚至趁機攻擊「對手」，何樂而不為呢？