中環出更：金民豪迪欣湖備戰划浴缸
大家喺端午節睇完划龍舟後，又輪到划浴缸比賽上演。旅遊發展局嚟緊周日父親節會喺尖東舉行香港國際龍舟邀請賽，屆時仲會有別開生面嘅「名人划浴缸邀請賽」，比賽兩人一組，鬥快完成一百米賽事。有份參賽嘅香港迪士尼行政總裁金民豪（Andrew），日前就特登喺自己地頭嘅迪欣湖練習備戰。
迪士尼樂園度假區龍舟隊「Disney Magic」早前喺赤柱龍舟錦標賽中，成功贏得混合組銀碗冠軍，隊員實力不容置疑。有見及此，Andrew尋日就把握機會，喺划浴缸邀請賽前相約Disney Magic嘅隊員一齊到迪欣湖進行賽前練習，希望對方傳授啲必勝秘技畀佢。
跌落水當消暑
人划龍舟，佢划浴缸，Andrew初次下水練習後直言划浴缸絕非易事，事關要平衡得好，同拍檔嘅默契極為重要。佢話嚟緊會同拍檔加緊練習，希望喺周日取得佳績，仲打趣話近日天氣咁熱，萬一比賽當日失平衡跌落水，都不失為消暑妙法喎。
據聞呢個划浴缸大賽仲邀請咗唔少商界人士同立法會議員參與，無論賽果如何，都必定有一番龍爭虎鬥。