中環出更：青聯新主席樂於加「辛」
香港青年聯會尋晚舉行換屆選舉，常務副主席葉振都（阿都）升呢為新主席，而會董會內都有唔少成員「升職」，大家都樂於加「辛」，拍住上一齊為青年服務。連任副主席嘅霍啟剛仲有一個小提議，希望今後可以搞多啲會員聯誼活動，等大家加深認識，事關青聯愈來愈多新會員，多啲溝通做事就更有默契啦！
葉振都以陳仲尼為榜樣
過去一屆青聯活動超過一百項，平均每三日就有一項活動，難怪即將卸任主席嘅陳仲尼（Rock）對全體會員嘅付出同支持深感謝意。回望在任兩年間，阿Rock自省有做得唔好嘅時候，亦肯定有令到兄弟姊妹唔舒服嘅地方，佢亦自問盡心盡力做好主席一職，所以呢兩年每晚都瞓得好好。其實阿Rock都太謙，尋日個大會，足足有過百人參加，證明佢好得人心啦。
眼見珠玉在前，準主席葉振都坦言戰戰競競，但佢話一定會學習阿Rock事事以大局為重嘅處事手法，亦會將大小事務攞出嚟商議，由各位兄弟姊妹投票決定，加上青聯好有制度，阿都話接手都唔怕出亂子，佢仲大讚阿Rock管數確係有一手，依家青聯足足有近三百萬元盈餘，所以佢都會秉承呢個高透明度嘅文化喎。
除咗阿都升呢外，負責做青聯賢慧社召集人嘅彭芷君，由司庫升上副主席，全國人大常委范徐麗泰嘅囝囝范駿華亦由副秘書長升任副主席，郭永亮就由副秘書長升做常務副秘書長，而上屆做常務會董嘅高鼎國及楊鼎立就升職做副秘書長，邱德根孫女邱詠麒亦由常務會董升副司庫。至於會董亦加入唔少新名字，好似康泰旅行社董事總經理黃進達、中信資本副總裁栗潛心等。
卓妮