政情：葛輝阿爸係已故法官高奕暉
前政府資訊科技總監葛輝（Jeremy Godfrey）早排踢爆政府多名高官為咗履行政治任務，不惜破壞行之有效、公平、公正嘅政府招標程序，欽點「上網學習支援計劃」嘅執行機構。醜聞曝光後，葛輝即成大紅人，個個都爭住追訪佢。尋日就有傳媒揭發，葛輝嘅背景唔簡單，原來係已故上訴庭法官高奕暉（Gerald Godfrey）嘅仔。
葛輝身世被揭，但相信佢唔會太介懷，不過一向享受寧靜生活嘅佢，未必可以好似以前咁安靜。佢透露，自從施壓事件廣泛報道後，自己就不時畀傳媒追訪，仲試過有周刊記者撳佢門鐘添。葛輝認為，呢個行為明顯唔係幾禮貌。
居於上水金錢村嘅葛輝，現時同老婆及兩個小朋友一齊住，佢一直積極於教育工作，同兩間喺北區嘅國際學校都好有淵源，現時仲係大埔康樂園國際學校嘅校董添。葛輝同香港政府場仗有排打，連佢自己都話希望放幾個月假先重投職場喎，唔知葛輝最終可唔可以討回公道呢？