中環出更：龐愛蘭釘珠背心裙大方得體
身兼藥劑師嘅沙田區議員龐愛蘭（Scarlett）經常笑容滿臉、神采飛揚，衣着亦成日令人有驚喜。卓妮日前喺一個活動上見到Scarlett，佢着咗件胸前鑲有金色釘珠嘅白色背心裙，線條簡單流暢，同佢嬌小玲瓏嘅身形十分相襯。講起條靚裙，原來背後有段溫馨故事。
姑奶送贈 購自美國
Scarlett話，條裙係佢老公嘅家姐（姑奶）特登喺美國買返港送畀佢，佢同姑奶情同姊妹，彼此疼錫對方。佢姑奶移民加拿大多年，次次返港探親都會帶十件八件靚衫畀佢。多年來Scarlett嘅衣着品味難免有轉變，佢姑奶都細心觀察到，所以次次帶返港嘅靚衫裙都好啱佢嘅心水。
當日個件背心裙就係姑奶喺美國西雅圖買嘅，雖然大咗一個尺碼，但係勝在設計簡單大方，金色釘珠圖案又夠晒特別，所以Scarlett好鍾意，興高采烈攞去畀改衣高手做「大手術」，依家着得零舍貼身。Scarlett話，佢嘅衣着品味不停改變，以前鍾意鮮艷嘅顏色，依家就鍾意經典嘅色彩。