中環出更：啟剛幫港大搞乒乓球賽
身為馬場稀客嘅港協暨奧委會義務副秘書長霍啟剛，前日罕有現身沙田馬場出席港大嘅「香港大學校友會百週年挑戰盃」賽事活動。佢本身係英國牛津大學校友，同港大似乎無乜關係，但因為港大今年底會搞個校長盃乒乓球比賽，身為體育世家之後嘅啟剛就幫手擔任籌委會成員。
邀內地校長來港參加
校長盃賽過往都喺內地舉行，今年首次移師香港做主辦，亦係港大百周年校慶活動之一，定咗喺年底舉行，到時內地多個院校都會派校長來港參賽。為咗兼顧各地校長嘅繁忙公務，所以務求一日內舉行晒所有比賽，啟剛話好多細節都要好好安排同磋商，下星期就會開會研究細節。
平時見啟剛都係西裝骨骨，原來佢好熱愛運動，閒時亦會打吓乒乓波，但佢笑言，雖然知道乒乓球賽例，但球技就認真麻麻，始終唔係專業運動員喎！