立法會資訊科技及廣播事務委員會喺嚟緊星期二召開特別會議，討論「上網學習支援計劃」招標醜聞，幾位事件主角前政府資訊科技總監葛輝、署理商務及經濟發展局局長蘇錦樑及常秘謝曼怡都已答應出席，唯獨被指係幕後施壓黑手嘅財爺鬍鬚曾，就以撞會為由拒絕出席，引起議員強烈不滿。不過，避得一時唔避得一世，鬍鬚曾將要面對一場更長時間、更嚴峻嘅公審。
我哋尋日收到消息，話鬍鬚曾好可能可以出席同一委員會喺本月十三日舉行嘅例會。該次例會原定有三項議程，其中「上網學習支援計劃」係臨時加插入去嘅，估計最多只傾到卅至四十五分鐘，令人懷疑鬍鬚曾特登選擇出席呢個例會而唔去本周二嘅特別會議，諗縮數希望畀人鬧少啲。
但就有人提議將當日另外兩項冇急切性嘅議程踢走，用晒兩個鐘頭嚟公審鬍鬚曾。鬍鬚曾嘅辯才一向水皮，被議員連番質詢下可能熬底自爆醜聞都未定，隨時偷雞唔到蝕揸米！