政情:選管會改指引鹵味男扯火

選舉管理委員會早前突然建議收緊區議會選舉活動指引,凡網上電台都要遵從「平等時間」原則,即係要畀同一選區嘅各名候選人均等嘅發言時間,此舉引起大批有強烈政治立場嘅網台及網民不滿。

立法會一個委員會尋日就區選細節安排舉行公聽會,外號「鹵味男」嘅人民力量成員錢偉洛,以「關注太監權益總工會主席」身份出席,炮轟選管會麻鷹唔管管雞仔,並以前自由黨主席田北俊做例子,話田少當年喺過海隧道賣廣告,開支動輒數十萬元,對於冇咁多錢嘅候選人唔公平,質疑選管會點解又唔管?其實鹵味男都唔使咁嬲吖,田少使咁多錢最後咪又係選唔到。

本身支持「五區公投」嘅鹵味男,又指公民黨嘅陳淑莊喺「公投」期間,亦用咗好多錢賣港鐵燈箱廣告,同樣唔公道。其實鹵味男講嘢都好公道,富貴黨大狀黨一次過鬧晒,如果佢將來主持網台節目時都用同一原則,就唔使擔心選管會嘅「平等時間」指引啦!

Money18免費即秒股票報價網站現推出8升級功能,財經資訊,實時實發!