教科書同教材分拆定價問題搞到滿城風雨，教育局局長孫明揚日前出招威嚇書商，如果一年內唔分拆教材定價，就公開招標引入競爭，尋日更宣布成立「學與教資源檢討工作小組」跟進。單憑小組名稱完全睇唔出同處理教材分拆有乜關係，但實際卻係探討及檢視「課本、教材及學材分拆定價」政策所引伸嘅問題，完全係巧立名目，更為咗日後卸責而設。
孫公喺○八年宣布成立「課本及電子學習資源發展專責小組」，由副局長陳維安領導，研究透過推行電子書減低書價，但搞咗兩年幾，結果成效同小組個名堂有好大落差，於是衍生教科書同教材分拆嘅建議，希望分拆教材後可以減低書價，可惜事與願違，迫使孫公向書商宣戰。
今次呢個「學與教資源檢討工作小組」又係交由陳維安負責，大家都知分拆教材問題相當棘手，就算成立小組都未必搞得掂，所以當局巧立名目將小組名稱「大包圍」，名稱含意相當廣泛，就算最後搞唔掂教材分拆，都肯定唔會出現「貨不對辦」，呢招夠晒縮骨。