中環出更：范鴻齡未釋懷拒談出山
唔經唔覺，前任「公職王」范鴻齡（Henry）辭任中信泰富董事總經理已經有兩年，以前佢日忙夜忙，依家時間就好使好多，卓妮曾經喺星期日見佢返教會，又去茶餐廳食早餐，悠然自得，尋日又見佢去香港會所食晏，仲食足一個半小時添，真係舒服過以前好多。
身形Fit冇肚腩
Henry今年農曆新年冇去到埃及，避過當地嘅動亂，搞到佢依家都冇乜外遊意欲，嚟緊端午節繼續留港消費。既然咁得閒，點解唔考慮復出或搵啲公職做吓呢？Henry一聽到，原本笑意盈盈嘅佢，忽然變得心事重重，話呢樣嘢唔會再諗，亦唔想再講。睇嚟佢當年離開中信泰富嘅心結，至今未能釋懷。
卓妮冇見Henry一排，佢嘅身形依然咁Fit，以前佢忙極都每星期抽幾日跑步做運動，尋日見佢狀態仍然大勇，亦唔見因為得閒咗而出現肥肚腩，睇嚟佢嘅生活規律至今未有改變。