政情：哪吒寧獨立無意埋堆
退出自由黨自立門戶組成經濟動力嘅林健鋒（Jeffrey），趁臨近端午節約埋班友好一齊包糉送畀啲公公婆婆，仲叫埋以前喺自由黨共事過嘅西貢區議員方國珊（哪吒）參加。點知哪吒遲大到，喺大家包晒糉兼食埋先至到，仲話今日純粹嚟撐場，冇心埋經濟動力堆，年底區議會選舉都傾向獨立參選，覺得咁樣仲開心啲、海闊天空喎。
經濟動力尋日搞咗個「糉是有情獻愛心」活動，派一千隻糉畀老人家。Jeffrey請埋哪吒參加，話唔係想拉攏人加入都好難信。不過，哪吒就話，因為之前Jeffrey喺地區議題上幫過佢，先至嚟撐場，雖然同經濟動力喺某啲議題上合作得好開心，但佢唔係要入黨，又話喺地區做事幫到市民就得，毋須喺政治架構入面服務市民。
哪吒遲大到，得番Jeffrey同班朋友包糉。Jeffrey話，以前每逢過時過節媽咪都會包糉，但林媽媽擔心佢包到漏晒啲餡，所以都唔敢畀佢包，估唔到佢細個已經「甩甩漏漏」，後來佢決心拜師學藝學包糉，至今包隻五角糉先至包得似模似樣冇失禮。