政情：黃星華靠電動咪發聲
前房屋局局長黃星華自退休後鮮有公開露面，好多人都想知佢嘅最新動態。尋日佢出席生命教育機構善寧會嘅活動時，雖然依然好似往日咁健步如飛，但說話明顯有啲吃力，細看之下，我哋仲見到佢頸上掛住一個又名電動咪嘅「電動喉頭」。原來黃星華喺幾個月前做咗個聲帶手術，今後要以電動咪幫助發聲。
出任善寧會榮譽會長嘅黃星華，尋日抽空出席該會搞嘅一個商場活動。黃星華話，自己早幾個月發現把聲有啲問題，即時入院做手術。佢承認做呢個手術其實相當痛，今後亦要依賴呢個電動咪同人溝通，好彩嘅係自己過去做義工時，見過唔少處境仲痛苦過自己嘅末期癌症病人，故佢亦好樂觀咁好快捱過喎。
黃星華又話，退休後除咗做義工外，一星期亦會做幾次健身，閒時又會去欣賞芭蕾舞，生活過得好開心。對於現時社會上樓困難嘅問題，黃星華就話「不在其位，不謀其政」，只係希望每個港人都可以安居樂業。