政情：商務局Greg蘇焗到尾
前任商務及經濟發展局局長劉吳惠蘭因病請辭接近兩個月，但面對特區夕陽政府風雨飄搖、醜聞不絕，冇人肯接任呢個爛攤子，局長一職至今仍然懸空，一直由未夠班嘅副局長蘇錦樑（Greg蘇）署任。雖然曾經傳過Greg蘇有望坐正，但最近就傳出中央已經否決咗由Greg蘇做局長嘅建議，所以有傳聞話政府無計可施下，焗住要Greg蘇繼續署任，拖到明年六月夕陽政府任期完結為止。
自從劉吳惠蘭辭職後，坊間已經傳出多個接任人選，但事隔兩個月後，大家終於明白只係政府一廂情願，好聽啲講就話政府未搵到合適人選，難聽啲講句，咪就係政府食晒檸檬，冇人肯同政府共度時艱囉！港府搵唔到人，無可奈何之下「廖化作先鋒」，可惜傳聞話中央唔畀Greg蘇坐正，港府被迫畀佢署任到呢屆政府任期完結，認真羞家。
咪以為Greg蘇做署任局長就可以過局長癮，事關有一大堆炸彈等住佢拆，除咗備受商界爭議嘅《競爭法》及第二階段《淫褻及不雅物品管制條例》公眾諮詢外，近日又爆出前政府資訊科技總監葛輝涉嫌受政治壓力風波，總之單單大嘢，任何一單出事都可以令奄奄一息嘅煲呔曾提早玩完，更隨時令佢嘅仕途行人止步。加上佢「名不正，言不順」，做起事時肯定阻手阻腳冇運行。
常任秘書長接手實際工作
有商界中人透露，其實自從劉吳惠蘭辭職後，當局為免Greg蘇做多錯多，已將局內所有實際工作交由兩位常任秘書長接手，政府亦樂得見佢成日出差周遊列國。該位商界中人又話，本來由常秘接手局內工作問題不大，但好衰唔衰，其中一位常秘，正係煲呔曾嘅愛將謝曼怡。
謝曼怡喺「葛輝受政治壓力風波」中被指為施壓傳話人，雖然呢單嘢仲未知係咪鋤得入政府，但謝曼怡經此一役後，做事係咪仲可以咁勇猛就真係好難講喇。講來講去，高官其身不正，令夕陽政府諸事不順，搞到民不聊生，大家都期望煲呔曾夕陽政府早走早着，咪再獻世累人累物。