中環出更：廠商會私竇歡聚大快朵頤
大隱隱於市，中環有好多隱身喺商業大廈內嘅私人會所，位於中環雲咸街南華大廈、有幾十年歷史嘅「五陵會」（The Sports Club），就係其中一間極私密嘅名人俱樂部。上周四晚膳時間，卓妮就發現中華廠商聯合會一眾會董喺度歡聚，齊歎佢哋嫓美城中名人飯堂嘅至尊美食，其中一道「焗蟹蓋」最令人回味無窮。
骨幹傾巢而出
原來廠商會會董每月開完會董例會後，有個慣例會搵個好地方聚餐聯誼，卓妮見到佢嗰晚就揀咗五陵會食飯。當晚廠商會嘅骨幹分子傾巢而出，會長黃友嘉、副會長施榮懷、徐炳光及吳永嘉、常務董事史立德等人都喺度，加上一眾會董，合共五、六十人共聚一堂飲酒作樂，不知幾開心。
當晚會董梅應春忙出忙入，成個主人家咁，原來佢做過五陵會主席多年，現任主席亦係佢嘅細佬、香港壁球總會主席梅應源，難怪大家飲得咁盡興。有咁啱得咁蹺，「福建幫頭領」全國政協委員施子清及全國政協常委楊孫西等人都喺隔籬房宴請內地貴賓，眾人仲走出嚟寒暄舉杯，氣氛High爆。
當晚菜式極之出色，食到會董們讚不絕口。其中真材實料嘅焗蟹蓋，被梅應春形容水準嫓美名人飯堂，係推介之選。美食當前，加上會所地方寬敞舒適，吸引好多會董查詢入會手續，可惜會所近年已極少接受新會員喇！
現場仲有好多新生代面孔，例如副會長徐炳光嘅囡囡徐詠琳，咪睇佢一個柔弱女流，其實佢學汽車設計，喺歐洲某汽車大廠做嘢，不過臨危受命，返港為爸爸創立嘅螺絲廠「急救」，如今公司漸有起色，難怪徐炳光一講起個寶貝女，就笑不攏嘴。
卓妮