政情：田二少包糉雞手鴨腳
傳聞銳意喺新界西出選嘅新民黨副主席田北辰（二少）又有新搞作，尋日戴住頂廚師帽，親自去到深井同班長者齊齊包糉，仲自掏腰包買咗四百隻糉派畀班公公婆婆添。不過，二少包糉雞手鴨腳，一味貪快，仲唔知點解愈包愈細隻，好似營養不良咁，搞到身邊同佢一齊包糉嘅婆婆都睇唔過眼，開聲點醒佢，話包糉要包大隻啲，否則蒸出來冇咁好食喎。
二少近日動作多多，話佢唔係選新界西都冇人信。二少話，自己會主力喺荃灣區工作，因為嗰度好多中產同中小企，相信會有一定支持票，但鄉事派票源就冇諗過可以搶到喇，所以較少入鄉村做嘢。二少仲好老定預咗自由黨唔會派人落新界西同佢爭，否則佢阿哥田北俊喺自由黨內已經「唔係最有影響力嗰個」喎！原來唔同黨都可以咁好關照，佢哋兩兄弟真係肝膽相照囉。