提起行政會議成員夏佳理（Ron），相信大家多數會諗起佢身兼港交所主席，但佢做西九文化區管理局董事呢項公職就比較新。原來阿Ron早就同藝術結下不解之緣，可惜佢太早接觸藝術，八歲一次公開演出令佢認定自己無唱歌同做戲嘅天分，可能因為咁，大家錯失咗一位演藝人才。
阿Ron接受西九管理局通訊訪問時自爆，八歲嗰年佢粉墨登場，為聖保祿小學演出音樂劇比賽，可惜佢嗰隊最終飲恨，因此自覺冇表演天分。不過，佢依然好享受藝術，閒時聽吓演奏會外，屋企亦收藏唔少藝術品，無論係畫、藝術照，抑或雕塑品都有。
大家咪以為阿Ron貴為西九董事，買飛睇騷一定無往而不利，佢話一直都好想睇作曲家Wagner（華格納）嘅音樂劇《尼伯龍根的指環》，可惜始終買唔到飛，但佢諗到請藝團來港演出，帶挈佢有得睇。