中環出更：新婚王賢訊八月做老竇
仁濟醫院總理王賢訊（Vincent）今年喜事停不了，四月初啱啱迎娶嬌妻Vincci，但話咁快就有咗愛情結晶，太太佗緊嘅BB女八月就出世。咦？大家係咪同卓妮一樣，覺得有時間疑點呢？哈哈！咪計較咁多，恭喜佢哋先喇！
卓妮日前喺快活谷馬場見到呢對快樂準爸媽，嬌小甜美嘅Vincci已經腹大便便，佢佗住個BB依然健步如飛，唔見太多水腫，名副其實係靚媽一名。
囡囡與爺爺同屬兔
當晚Vincent名下愛駒「安瑪」出賽，Vincent特登同太太一齊入場湊熱鬧，仲叫埋Vincci細妹同男友陪住太太，認真細心。
講起就嚟升格做爸媽，兩人都笑不攏嘴，迎接新生命嘅喜悅，連旁人都感受到。BB女係小小兔女郎，未出世就預知會被爺爺、前仁濟醫院主席王忠秣錫到燶，點解？因為爺爺都屬兔囉！
今年王忠秣認真喜事連連，除咗囝囝結婚生女外，囡囡都為佢添咗一名外孫，眨吓眼就多咗兩名乖孫。人生最樂，莫過於此。
卓妮