政情：林偉強搵阿媽拉票？
新界鄉議局今日改選領導層，劉皇發同張學明如無意外分別連任正、副主席，但另一位副主席、人稱「小強」嘅林偉強選情就似乎無咁樂觀，將面臨荃灣鄉事委員會主席鍾偉平挑戰，近日鄉郊就傳出小強搵阿媽幫手拉票，落嘴頭叫發叔幫手，唔通小強真係咁勢危？
失落坪洲鄉委會主席、離島區議會主席後，小強剩低嘅怕且只有鄉議局副主席一職，假如連呢個位都輸埋，真係一鋪清袋，所以近日有傳小強搵阿媽幫手拉票。小強就否認搵阿媽幫手拉票，仲話阿媽年紀大，而且唔熟悉班鄉紳喎，總之佢話今日參選會全力以赴。
有鄉事中人話，發叔為免因為副主席之爭，傷到大家和氣，提議決定抽籤解決，但遭小強對手陣營反對。究竟鹿死誰手，發叔尋日出席行政會議時話：「聽日（六月一日）咪知囉！」至於有冇幫小強拉票，發叔斬釘截鐵話：「佢又係選，我又係選，拉咩？」睇嚟今日一戰，兩路人馬只能各安天命囉。