政情：民記有鋪嘥錢癮

民建聯多名立法會議員日前被揭利用辦事處嘅營運開支濫印宣傳品，除咗譚Sir被踢爆慷市民之慨，印製一百萬個利是封外，身兼行會成員嘅劉江華亦被揭曾豪擲近十六萬，訂造二萬五千個環保袋。

但原來劉江華除咗係「袋王」外，對紙扇亦情有獨鍾。我哋發現，佢同樣曾花約十六萬，製作二萬五千個民建聯摺疊扇派街坊，扇上寫住「做服務如風不息」。劉江華嘅地區工作係咪如扇所言咁就唔知嘞，但佢派嘢就肯定如風不息！

另外，雖然張學明向來予人古肅之感，但原來佢對點樣宣傳自己頗有心得。佢曾喺今年花咗成萬銀，喺三千二百架巴士上賣長達七秒嘅新春廣告，又曾一口氣訂造四百個有佢自己嘜頭嘅易拉架，務求梗有一個喺左近。咁都唔止，佢仲花咗近十五萬元訂造六萬八千多條印有佢個名嘅毛巾。張學明早前因捲入僭建風暴而搞到一額汗，為咗「一了百了」，佢決定成幢樓拆過再重建，呢六萬八千多條自家製毛巾，用嚟抹佢嘅一額汗就啱晒。

新特首民調避敏感問題

除咗派嘢外，民建聯其實定時會做吓民調反映民意。可惜佢哋尋日公布嘅「下任特首最需解決的工作」民調，結論同「阿媽係女人」差唔多，因為喺佢哋嘅民調裏面，對下屆特首屬意人選、下屆政府應否處理廿三條立法等社會關注嘅問題隻字不提，反而問市民最想解決嘅問題係乜，呢啲問題，唔做民調都知答案喇。