中環出更：林凱章寓工作於娛樂
年輕人成日返工都話無心機，嫌人工低、嫌工時長、嫌老細唔好，總之一定搵唔到啱心水嘅地方，歸根究柢，同份工唔啱心水好有關，立法會議員林健鋒位公子林凱章（Victor）依家喺屋企間玩具廠幫手，佢話由細到大都好鍾意玩玩具，所以好鍾意份工，見佢做廠佬做得咁起勁，絕對無做嗰行厭嗰行嘅無奈。
砌模型達百件
Victor除咗鍾意玩玩具，仲係砌模型高手，經佢手砌出嚟嘅模型依家多達一百件，全部放晒喺公司陳列，不過佢謙稱出書教人就唔得，但係如果有朋友搞模型比賽叫佢去做評判的話，佢一定會支持到底。
講開又講，時下年輕人沉迷打機，仲搞到自尋短見，呢個社會問題，真係好值得家長同老師研究。Victor唔少做校長同老師嘅朋友都有遇到呢個問題，仲試過有個學生一返到屋企就匿埋入房，用電腦同家人互傳消息。Victor細個都係機迷，但依家佢除咗要幫屋企手打理生意之外，亦要分身做全國青聯委員同菁英會會員，所以佢都要將電玩放低。