政情：鐵三角零交流兼快閃
下任特首三大疑似候選人，全國人大常委范徐麗泰、政務司司長唐英年同埋行政會議召集人梁振英（CY）尋日齊齊出席辛亥革命百周年展覽活動，三強難得同場，但交流近乎零。
個活動尋日人頭湧湧，喺活動開始前，唐唐同CY應大家要求握手合照，兩個人雖然都伸出友誼之手，但表情就鬼咁尷尬，影完相仲即時你有你向左走，我就向右走，范太就更加行到無雷公咁遠，要拉佢哋三個一齊影相都好難，終於咪就係依家見報嘅幾十人大合照囉。
到展覽開幕典禮結束，三個都極速閃人，唐唐同CY一馬當先逃離現場。范太就畀成班記者包圍住，范太雖然話佢唔會再講嘢，因為佢講咩都畀人話佢想選特首，佢費事誤導人，叫大家兩個月後佢「玩完」再問佢，但被問到日前佢大講廿三條立法係咪想取悅中央，佢就話一早已經講過呢個話題，佢亦無話要政府立即為廿三條立法，立唔立法由現屆政府決定。