政情：大舊石戒口速減18磅
減肥最難就係要堅持同有恒心，立法會議員石禮謙最近為咗健康要減肥，短短兩個月時間，已經減咗十八磅，距離目標只係剩番兩磅，話唔定聽朝瞓醒去埋個廁所就達標都唔定。
不過老實講，尋日佢去馬場拉頭馬，睇落唔係好覺佢唔見咗十八磅肉，大舊石話可能係件衫影響咗視覺，佢話依家成個人都輕鬆晒，精神咗好多，不過都仲要繼續戒口。
佢減肥後輕巧咗，自然健步如飛，佢同朋友隻團體馬都一樣快人一步，尋日跑咗場頭馬，帶挈佢獨贏加位置合共贏咗張金牛落袋。不過大舊石為咗健康，肯定唔會攞彩金嚟食嘢，仲講到明五月糉都唔會放入口，真係好有決心。
大舊石今次減肥成功，除咗要多謝自己有決心之外，仲要多謝佢個靚靚女友Lisa，事關大舊石減肥期間都有好多應酬唔去唔得，Lisa難免食埋佢嗰份，難得Lisa天生麗質，點谷都唔肥，所以話，呢個世界真係一凹配一凸架！