政情:民記瘀事傳千里

是非年年有,民建聯呢期特別多。早前民建聯幾個立法會議員被人揭發間屋有僭建物,成個黨畀人改名,叫做僭建聯,最新嘅係原來民建聯又畀人叫做嘥錢聯,點解?以黨主席譚耀宗為首嘅立法會議員被揭發用嚟做啲令人意想不到嘅嘢,佢哋係就係冇違規,不過政黨做啲咁嘅事,難免畀人質疑。

每個財政年度,每位議員都有一筆大概一百六十五萬嘅辦事處營運開支,佢哋用啲錢嚟做乜呢?譚耀宗喺上年九月、即係上年度最後一個月,竟然一次過狂印一百萬個兔年利是封同四萬個磨沙年曆,用嚟派街坊。

同黨嘅劉江華過去兩個年度用咗超過六位數字嘅錢,用嚟整咗共五萬個環保袋同圓扇形尼龍袋,堪稱「袋王」。

畀人話嘥錢,譚耀宗尋日大呼冤枉,喺一個活動致詞同面對傳媒時都滔滔不絕話畀人「老屈」,解釋一疊利是封有廿個,印一百萬個其實得五萬疊,新界東有二百萬人,「五萬人攞到都好合理啫!冇乜咁大罪過吖!」

譚耀宗解畫稱符合守則

雖然譚耀宗承認上年九月單月用咗近四十萬元,不過強調做法符合所有立法會守則,而印利是封同年曆只用咗廿三萬,唔可以同其他開支加埋一齊講,而今次係第一次印利是封,街坊收到不知幾開心,實用又可以幫街坊慳番幾蚊,「一陣間就派晒」,佢堅決否認係浪費公帑。

有報道話佢有大量利是封派唔出,譚耀宗就解釋話,某報記者「設局」,打電話去佢辦事處訛稱屋企辦喜事,職員見擁躉叫到先千方百計搵幾個畀佢。佢話報道係誤導同有偏見,至於會唔會投訴嗰份報紙呀?佢話咩行動都唔排除,叫對方「收斂下」喎。

至於「袋王」劉江華就話造袋實為配合膠袋稅鼓勵市民用環保袋,新界東一百七十萬人口,整袋唔算多,呢啲宣傳品係同選民溝通方式之一;而同區嘅陳克勤亦話印十九萬份工作報告合理正常,但坦言有職員計錯重量,所以用多咗幾萬蚊郵費,又自嘲自己知名度唔高,所以要印多啲等人知佢係乜水喎。

喺僭建風暴中,張學明、黃容根同陳鑑林都處身風眼,有黨員仲差啲捲入「葛輝風波」,依家又畀人執多劑。其實做人行得正企得正,無論係唔係風季,都唔會有事嘅。不過如果其身不正,就好難講喇。

Money18免費即秒股票報價網站現推出8升級功能,財經資訊,實時實發!