中環出更：顧明均句鐘籌300萬
出外靠朋友，義字當頭嘅「電子大王」顧明均老友多，吹雞做善事一呼百應，日前佢幫老友為老撾一間眼疾兒童寄宿學校籌款，結果目標廿萬美元超額完成，一個鐘唔夠就籌近三百幾萬港紙，真係點到你唔服。
人稱「顧翁」嘅南太電子創辦人顧明均今次幫呢間學校籌款，係因為佢老友、美國Napa其中一個酒莊嘅主人Margrit Mondavi原本同親友喺香港搞咗一個紅酒慈善拍賣會，點知個拍賣會臨時脫腳，咁啱顧翁搞咗個Party將Margrit介紹畀香港嘅老友，以便大家去Napa試酒可以落腳。眼見個拍賣會突然告吹，顧翁心生一計，將個試酒會變成籌款活動。
肥亨兩老表撐場
中策主席馬時亨頭盤未食完已經投咗兩Lots酒，佢老表曾志偉因為同成班演藝老友坐得較隱蔽，結果要開大嗓門嗌價先投到。前港姐鄺美雲夠醒目，佢一聽到拍賣開始即刻搬櫈坐近枱邊，結果當然近水樓台啦。同顧翁老友鬼鬼嘅「文具大王」杜振源父子、顧嘉煇囝囝顧致和加埋顧翁唔同範疇嘅朋友，個個都舉手無手軟，拍賣氣氛好高漲。