中環出更：球伯方文雄凝聚厚街情誼
講起東莞嘅厚街鎮，大家可能諗起「家具之都」、「鞋業名鎮」等美譽，原來本港唔少名人來自厚街鎮，估計旅港鄉親有三萬多人。
出錢出力組同鄉會
為咗凝聚厚街人嘅情誼，香港厚街同鄉會日前成立並舉行首屆會董就職禮，協成行董事總經理方文雄當選首屆會長。當日出席嘅嘉賓個個同聲同氣，氣氛零舍熱鬧開心。
長江製衣主席陳瑞球、協成行主席方潤華都係厚街成功商人，所以兩家人對同鄉會成立出錢又出力，認真唔話得。方潤華、球伯同姪仔全國政協常委陳永棋都係名譽會長，球伯囝囝陳永燊、囡囡陳淑玲（Shirley）就擔任副會長，Shirley仲兼任秘書長添！
方文雄話，成立同鄉會係希望下一代飲水思源，知道自己嘅根喺邊度，唔好講起內地只知道上海同北京。可能大家未去過厚街，棋哥於是擔當聲音導遊落力推介，話厚街曾經係東莞最有錢嘅地方，有首童謠個個都識唱：「噯姑乖，噯大姑乖嫁厚街」，所以話，厚街男人唔怕會娶唔到老婆㗎！
Shirley就對家鄉特色菜「蒸蟹餅」讚不絕口，佢自細食嫲嫲整嘅蒸蟹餅長大，後來嫲嫲將秘訣傳畀工人，代代相傳，至今逢親家人團圓歡聚，工人就會整嚟畀大家享用，感覺好親切。蒸蟹餅係用水蟹肉、豬肉、瑤柱、鹹蛋及核桃酥炮製而成，過程好考功夫，但近年佢返去鄉下，已搵唔番嗰種熟悉嘅味道。
當晚出席嘅政商嘉賓逾二百人，包括廣東社團總會主席王國強、香港東莞同鄉總會主席王賜豪等人。八十幾歲嘅球伯當晚心情靚絕，係咁捉住鄉里玩打手掌，個個都唔夠佢反應快，只有捱打嘅份兒，睇到大家笑哈哈。Shirley笑稱，爸爸喺屋企成日同孫仔、孫女玩，所以佢囡囡經常投訴，話公公又打人喇！
卓妮