政情：鬧盡「鐵三角」葉劉爭特首？
三名下屆特首疑似候選人，包括全國人大常委范徐麗泰、政務司司長唐英年及行政會議召集人梁振英（CY）日前分別接受唔同媒體專訪，大談治港睇法，令特首選舉氣氛打得火熱。
不過，同樣被視為特首「黑馬」嘅新民黨主席葉劉淑儀，尋日就公開向三人大潑冷水，點評各人的不是，唔通佢覺得自己先至係「真命天子」？
師姐都唔放過
唐唐日前發表「香港冇地產霸權」嘅言論，一石激起千重浪。葉太尋日就狠批唐唐含住金鎖匙出世，最冇資格講地產霸權，仲話唐唐就關愛基金穩袋地產商幾億後，發表呢番言論實在不負責任。
其後葉太又轉移踩CY，話CY倡議嘅「區長制」行唔通，唔明點解CY做咗行會成員咁耐都咁無知，仲話CY過分褒揚內地機遇，忽略強化香港嘅重要性。
作為范太師妹嘅葉太，原本都拒絕評論范太就廿三條嘅言論，估計係想畀番幾分薄面對方，但尋日下晝又一改口風，暗寸范太咁做係向北京交心喎。