中環出更:攞命陳雜誌送飯 自得其「樂」

金管局總裁陳德霖(攞命陳)尋日朝早去立法會匯報外匯基金首季投資表現,中午去咗ifc影音店Disc Plus買碟,揀咗隻由珊迪娜布洛主演嘅電影《守護有心人》,相當文藝。之後再行去粥麵店正斗醫肚。

時值晏晝一點四十分,店內人潮漸散,攞命陳一個箭步坐埋「卡位」,柯打一碗粥再加一碟菜,食得好清淡。當熱烘烘餸菜上枱後,佢忽然攞本音響雜誌出嚟,邊睇邊食,樂在其中。歎住雜誌食粥,特別滋味,唔使廿分鐘就將食物掃清。佢食完粥行返寫字樓,仲耷低頭用iPhone發短訊添。

(徐家浩攝)

Money18免費即秒股票報價網站現推出8升級功能,財經資訊,實時實發!