政情:維園阿哥獲阿爸力撐

早前捲入非禮強姦案嘅「維園阿哥」、人民力量成員任亮憲,因證據不足而獲警方不予起訴,尋日更「強勢回歸」佢嘅發迹地《城市論壇》,引起全場騷動之餘,更喺台上台下點起處處火頭。前立法局議員任善寧亦身體力行出嚟力撐愛兒,仲話相信佢經一事長一智,以後知道有啲事係唔可以「隨心所欲」喎,呢句說話真係可圈可點,擊中問題要害。

成功甩難嘅任亮憲,尋日以勝利者姿態施施然進場,更繞場一周與在場者握手。為咗愛兒而延遲返美大計嘅任善寧,尋日更穿上人民力量嘅T-shirt坐足全程。佢希望今次教訓可以鞭策任亮憲以後做好啲、處事謙卑啲,又話自己不時都會同個仔分析區會選舉形勢,會全力支持佢重返政壇喎。

曾經話要做「背後男人」替黨友助選嘅任亮憲,亦一改口風話會積極考慮參選,但就話未揀定落邊區。

Money18免費即秒股票報價網站現推出8升級功能,財經資訊,實時實發!