政情：黃仁龍邱騰華狠摑煲呔曾
尋日我哋先講過，政務司司長唐英年尋日同民建聯夾計，喺立法會就港珠澳大橋環評官司策動反攻，狠批外號「大狀黨」嘅公民黨變咗「亂撞黨」。點知政府呢頭展開反擊，嗰頭就火燒後欄，畀兩個律師會聯手反駁煲呔曾日前就環評官司嘅講話，暗批佢有違法治同司法獨立。專責法律政策嘅律政司司長黃仁龍同專責環保政策嘅環境局局長邱騰華，尋日分頭幫煲呔曾補鑊，點知愈描愈黑變柴政府台，雙雙狠摑煲呔曾兩巴。
煲呔曾日前喺立法會答問大會上，炮轟有政黨、政客借環保之名阻撓基建發展，叫市民深思司法程序係咪被濫用，明顯係唔忿氣輸咗官司發爛渣。大律師公會同律師會睇唔過眼，前日罕有發表聯合聲明，不點名鬧煲呔曾言論有違法治。
兩律師會聯手發炮
冇公開講嘢好耐嘅黃仁龍，尋日出席資深大律師委任典禮後罕有發表講話，原意係想為政府解畫，話煲呔曾都只係引述社會上嘅某啲意見，冇話自己認同有關意見。不過睇番黃仁龍實際嘅講話內容，竟然有一大半都暗寸緊煲呔曾！
黃仁龍一開波就話，大橋環評官司已經啟動上訴程序，所以大家都唔應該進一步評論，咁即係煲呔曾都唔應該講喇？佢又話政府不時都打輸官司，即使情況嚴重，都必須尊重法院判決，而且一日未上訴成功，都要根據判決做事，最後仲加多句「這是非常重要的」，同樣好似係鬧緊政府，與兩個律師會同一鼻孔出氣。佢又強調，有信心上訴庭會不偏不倚、好專業同持正咁作出判斷，好似幫緊煲呔曾向班法官認衰道歉咁。政界盛傳黃仁龍做埋呢年多任期就會唔撈，唔通佢係想臨別吐真言？
邱騰華尋日喺電台被問及有關問題時，亦強調香港係個法治社會，邊一個不滿行政措施，都可以向法院提出訴訟，當然政府亦有權上訴，相信法院會一視同仁。雖然佢冇黃仁龍踩得咁應，但亦都冇學煲呔曾咁發爛渣，將輸官司嘅怨憤發洩喺他人身上。
夕陽政府鳥獸散，煲呔曾任期已進入倒數階段，佢旗下嘅高官各自為政、唔願撐老細、甚至明撐暗踩、公開同政府唱反調嘅例子，相信嚟緊一定愈嚟愈多！