中環出更：愛駒爆大冷 張永珍袋過百萬
雖話長江後浪推前浪，但有時薑愈老愈辣，好似前全國政協常委張永珍匹愛駒「愛心大使」，雖然八歲馬齡，但尋日就大發神威，以七十五倍大冷門姿態奪冠。今次係「愛心大使」出道以來第四次奪冠，對上一次勝出已經係兩年前嘅事，所以張永珍喜出望外，加上愛駒八歲高齡，跑出成績算係有所交代。
獨贏派755元
「愛心大使」每次參賽，張永珍都一定投注支持，今次都唔例外，獨贏同位置佢都各投注一萬元，結果獨贏派七百五十五元及位置獎金派一百九十一元，共收到近九十五萬元，連埋廿八萬五千元嘅馬主獎金，過百萬橫財袋袋平安。
每年都會捐幾百萬至一千萬元做善事嘅張永珍話，「愛心大使」本來係友人對佢嘅暱稱，後來就將個名用咗做愛駒個馬名，所以今次愛駒咁叻跑第一，佢當然都會繼續做愛心大使捐錢啦！
拉完頭馬，張永珍再睇埋佢名下另一匹新馬「頭等艙」出賽，不過，今次第二次上場嘅「頭等艙」，仲未跑出理想成績，但張永珍話唔介意，咁又係，仲有大把機會吖嘛！
卓妮