中環出更：饒宗頤獲頒名譽文學博士
身為「潮州之寶」嘅國學大師饒宗頤，又再多個銜頭，事關佢獲塔斯曼尼亞大學頒授名譽文學博士學位，頒授儀式將於下星期一假香港大學王賡武講堂舉行。塔斯曼尼亞大學校長Peter Rathjen教授形容，饒老係一代「通儒」，亦係中國「國寶級人物」，喺中國文、史、哲、藝等領域上有巨大成就。
與塔斯曼尼亞大學結緣
饒老同塔斯曼尼亞大學嘅友誼始於○九年，當年饒老喺塔斯曼尼亞舉行個人作品展，令到彼邦深感饒老嘅關愛。Rathjen坦言，可以同中國及饒老結下文化緣分，令佢深感榮幸，所以希望呢個美好嘅因緣將來可以帶來豐碩果實。Rathjen仲大讚饒老透過作品對中國作出兩樣重要貢獻，包括令中國人建立更高國家認同感，亦令其他文化嘅人認識中國文化獨特地位，並且對中國喺世界文化上有更深刻嘅認知。
身為饒老fans嘅骨科名醫高永文都好認同，佢講到明只要下星期一冇緊急手術要做，一定會去支持饒老，大讚饒老當之無愧。身經百戰嘅高醫生，仲話經常會約饒教授見面，聽佢講人生道理，令佢獲益良多。