女主持被問貼士：有就唔使做！
【本報訊】亞視藝員戚黛黛今晚會擔任歷史性億元六合彩開彩攪珠節目主持，她形容心情異常緊張。剛從韓國拍旅遊節目返港的黛黛說，原以為是星期四攪珠開彩，但怎料連續八期無人中頭獎而累積了大彩池兼延後一日攪珠，更由她做主持，她笑說：「一返到嚟香港，就接到好多朋友、fans打電話問我攞六合彩貼士！」黛黛嘆說一聲：「如果有貼士我就唔使做主持啦，邊度有貼士㗎！」
身為六合彩主持的黛黛並不需要申報利益，因為攪珠結果不涉及人為影響，黛黛說：「其實我雖然係做主持，但都可以買埋六合彩一份，但係我唔買，係因為擔心一邊主持節目，一邊又要留意住攪珠嘅結果就會分心啫！」至於不投注買六合彩，她形容「太過刺激啦！我成日都同啲同事講，如果報報吓六合彩攪珠結果，主持人心臟病發咁點算，嚇到啲同事死，所以冇再買。」
與黛黛輪流主持六合彩攪珠節目的蔡國威說，昨日亦有買電腦票，希望博到一個贏錢機會。