政情：黃金寶獲頒榮譽院士
有「亞洲車神」美譽嘅香港單車代表隊員黃金寶，多年來為個人及香港屢奪殊榮，嚟緊佢又會多一單威水史，不過今次就同比賽或獎牌無關，而係獲香港城市大學頒發榮譽院士。阿寶一直係單車界嘅精神領袖，今次獲頒榮譽院士，除咗肯定佢多年來嘅運動成就外，亦對單車運動打入一支強心針。
除咗阿寶之外，○八年參加過殘疾人奧運馬術賽嘅選手葉少康、全國政協委員黃楚標及陳振東，都獲城大頒授榮譽院士名銜。「標哥」黃楚標現為東海聯合（集團）主席，係最早開發深圳嘅商界人士，所以享有「深圳王」美譽，並積極支持城大喺內地嘅活動同發展。至於陳振東為渝振控股集團主席，多年來慷慨捐贈予城大發展。四位傑出人士嘅頒授典禮將於九月廿二日舉行。