中環出更:威威獅令搶扮嘢文風頭

海洋公園由去年七月至今累積五百一十萬人次入場,勢必打破歷年成績,主席盛智文(扮嘢文)尋日拉埋海洋公園標誌「威威獅令」跳舞慶祝,仲向第五百一十萬零一位入場嘅伍氏家庭派發終生免費入場證。期間扮嘢文好落力逗伍氏千金玩,可惜BB女全程都係捉住威威獅令毛公仔玩,唔知係咪驚咗光頭叔叔呢?

伍氏夫婦尋日朝早十點鐘帶同廿六個月大嘅BB女及四個月大嘅囡囡入場,結果一入場就發現中獎,獲得終生免費入場證、雪糕禮券、海洋公園餐廳貴賓房晚宴等禮物,伍氏一家喺台上接受訪問時都非常開心,聲言日後會多啲去海洋公園喎!

至於作為主人家嘅扮嘢文就全程鬼咁風騷,喺台上不停逗BB女玩,又遞咪又握手。不過,BB女都係鍾情威威獅令,全程抱住威威獅令公仔,仲同真人扮演嘅威威獅令握手,但就眼尾都唔多望扮嘢文,看來今次威威獅令威過扮嘢文喇,唔知扮嘢文下次會否扮演威威獅令呢?

卓妮

Money18免費即秒股票報價網站現推出8升級功能,財經資訊,實時實發!